1ܒܵܬ݇ܪ ܐܲܢܹܐ ܚܙܹܠܝܼ ܡܲܠܲܐܟܼܵܐ ܐَܚܹܪَܢܵܐ ܕܒܸܨܠܵܝܵܐ ܡ̣ܢ ܫܡܲܝܵܐ؛ ܕܐܝܼܬ ܗ݇ܘܵܐ ܠܹܗ ܗܘܼܟܡܵܐ ܓܘܼܪܵܐ؛ ܘܐܲܪܥܵܐ ܒܘܼܗ݇ܪܸܢܵܐ ܡ̣ܢ ܬܸܫܒܘܿܚܬܹܗ. 2ܘܩܘܼܘܸܚܠܹܗ ܒܩܵܠܵܐ ܚܲܝܠܵܢܵܐ؛ ܟܲܕ ܒܹܐܡܵܪܵܐ؛ ܢܦܸܠܵܐ؛ ܢܦܸܠܵܐ؛ ܒܵܒܹܠ ܗ̇ܝ ܓܘܼܪܬܵܐ؛ ܘܗَܘܹܐܠܵܗ̇ ܡܲܫܪܵܝܬܵܐ ܕܕܲܝܘܹ̈ܐ؛ ܘܢܛܘܼܪܬܵܐ ܕܟܠ ܪܘܼܚܵܐ ܛܲܡܹܐܐ؛ ܘܢܛܘܼܪܬܵܐ ܕܟܠܵܝܗܝ ܛܲܝܪܹ̈ܐ ܛܲܡܹ̈ܐܐ ܘܣܸܢܝܹ̈ܐ. 3ܣܵܒܵܒ ܡ̣ܢ ܚܲܡܪܵܐ ܕܚܸܡܬܵܐ ܕܙܵܢܝܘܼܬܘܼܗ̇ ܫܬܹܠܘܿܢ ܟܠܵܝܗܝ ܛܵܝܸܦܹ̈ܐ؛ ܘܡܲܠܟܹ̈ܐ ܕܐܲܪܥܵܐ ܥܲܡܵܗ̇ ܙܢܹܠܘܿܢ؛ ܘܬܵܓ̰ܝܼܪܹ̈ܐ ܕܐܲܪܥܵܐ ܡ̣ܢ ܚܲܝܠܵܐ ܕܠܲܙܲܬܘܼ̈ܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ. 4ܘܫܡܸܥܠܝܼ ܩܵܠܵܐ ܐَܚܹܪَܢܵܐ ܡ̣ܢ ܫܡܲܝܵܐ ܒܹܐܡܵܪܵܐ؛ ܦܠܘܿܛܘܿܢ ܡܸܢܘܼܗ̇؛ ܛܵܝܸܦܵܐ ܕܝܼܝܼ؛ ܕܠܵܐ ܫܲܪܸܟܝܼܬܘܿܢ ܒܚܛܝܼܵܬܘܼ̈ܗ̇؛ ܘܡ̣ܢ ܡܲܚܘܵܬܘܼ̈ܗ̇ ܠܵܐ ܗ݇ܘܹܐ ܕܩܵܒ݁ܠܝܼܬܘܿܢ. 5ܣܵܒܵܒ ܕܡܛܹܠܘܿܢ ܚܛܝܼܵܬܘܼ̈ܗ̇ ܗܲܠ ܫܡܲܝܵܐ؛ ܘܕܟܸܪܹܐ ܐܲܠܵܗܵܐ ܠܥܵܘܠܹ̈ܐ ܕܝܼܵܗ̇. 6ܦܪܸܥܡܘܿܢ ܠܵܗ̇ ܐܲܝܟܼ ܕܐܘܼܦ ܗ̇ܝ ܦܪܸܥܠܵܐ؛ ܘܗܲܒ݇ܠܘܿܢ ܠܵܗ̇ ܚܲܕَ ܒܬܪ̈ܲܝ ܐܲܝܟܼ ܦܘܼܠܚܵܢܘܼ̈ܗ̇؛ ܒܗ̇ܘ ܟܵܣܵܐ ܕܡܙܸܓܼܠܵܗ̇؛ ܡܙܘܿܓܼܘܿܢ ܐܸܠܵܗ̇ ܚܲܕَ ܒܬܪ̈ܲܝ. 7ܟܡܵܐ ܕܚܩܸܪܵܐ ܓܵܢܘܼܗ̇ ܘܛܘܼܒܸܠܵܐ؛ ܗܲܪ ܗܲܕܟܼܵܐ ܓ̰ܘܼܢܓ̰ܵܪܵܐ ܗܲܒ݇ܠܘܿܢ ܠܵܗ̇ ܘܬܵܙܝ. ܣܵܒܵܒ ܒܹܐܡܵܪܵܐ ܝَܠܵܗ̇ ܒܠܸܒܘܼܗ̇؛ ܒܸܬܝܵܒܼܵܐ ܝܘܵܢ ܡܲܠܟܬܵܐ؛ ܘܠܹܐ ܝܘܵܢ ܐܲܪܡܸܠܬܵܐ؛ ܘܬܵܙܝܼ ܠܹܐ ܚܵܙܝܵܐ ܐܢܵܐ. 8ܣܵܒܵܒ ܕܐܵܗܵܐ ܒܚܲܕَ ܝܵܘܡܵܐ ܒܸܬ ܐܵܬܝܼ ܐܲܢܹܐ ܡܲܚܘܵܬܹ̈ܐ ܕܝܼܵܗ̇؛ ܡܵܘܬܵܐ؛ ܘܬܵܙܝܼ؛ ܘܟܸܦܢܵܐ؛ ܘܒܢܘܼܪܵܐ ܒܸܬ ܦܵܝܫܵܐ ܡܘܼܩܸܕܬܵܐ؛ ܣܵܒܵܒ ܚܲܝܠܵܢܵܐ ܝܠܹܗ ܡܵܪܝܵܐ ܐܲܠܵܗܵܐ ܗ̇ܘ ܕܕܝܼܢܵܠܹܐ. 9ܘܒܸܬ ܒܵܟܼܝܼ ܥܲܠܘܼܗ̇ ܘܒܸܬ ܥܵܒܼܕܝܼ ܬܵܙܝܼ ܥܲܠܘܼܗ̇ ܡܲܠܟܹ̈ܐ ܕܐܲܪܥܵܐ؛ ܐܵܢܝܼ ܕܥܲܡܵܗ̇ ܙܢܹܠܘܿܢ ܘܛܘܼܒܸܠܘܿܢ؛ ܐܝܼܡܲܢ ܕܚܵܙܝܼ ܠܬܸܢܵܐ ܕܝܩܝܵܕܘܗ̇؛ 10ܟܲܕ ܡ̣ܢ ܪܸܚܩܵܐ ܟܸܠܝܹܐ؛ ܡ̣ܢ ܙܕܘܼܥܬܵܐ ܕܓ̰ܘܼܢܓ̰ܵܪܘܼܗ̇؛ ܒܹܐܡܵܪܵܐ؛ ܘܵܝ؛ ܘܵܝ؛ ܡܕܝܼܢ݇ܬܵܐ ܗ̇ܝ ܓܘܼܪܬܵܐ؛ ܒܵܒܹܠ؛ ܡܕܝܼܢ݇ܬܵܐ ܗ̇ܝ ܚܲܝܠܵܢܬܵܐ! ܣܵܒܵܒ ܐܬܹܠܵܐ ܕܝܼܘܵܢ ܕܝܼܵܟܼܝ. 11ܘܬܵܓ̰ܝܼܪܹ̈ܐ ܕܐܲܪܥܵܐ ܟܹܐ ܒܵܟܼܝܼ ܘܥܵܒܼܕܝܼ ܬܵܙܝܼ ܥܲܠܘܼܗܝ؛ ܣܵܒܵܒ ܕܛܲܥܢܵܝ ܐَܚܹܪَܢܵܐ ܐ݇ܢܵܫܵܐ ܠܹܐ ܙܵܒܸܢ؛ 12ܛܲܥܢܵܐ ܕܕܲܗܒܼܵܐ؛ ܘܕܣܹܐܡܵܐ؛ ܘܕܟܹܐܦܹ̈ܐ ܛܝܼܡܵܢܹ̈ܐ؛ ܘܕܡܲܪ̈ܓܵܢܝܵܬܹܐ؛ ܘܕܟܸܬܵܢ ܢܵܙܸܟ؛ ܘܕܣܡܘܿܩܵܐ؛ ܘܕܲܐܒܪܹܣܝܼܡ؛ ܘܕܩܸܪܡܝܼܙ؛ ܘܟܠ ܩܲܝܣܵܐ ܕܒܸܣܡܵܐ؛ ܘܟܠ ܡܵܐܢܵܐ ܕܓܪ̈ܲܡܦܝܼܠܵܐ؛ ܘܟܠ ܡܵܐܢܵܐ ܕܩܲܝܣܵܐ ܪܵܒܵܐ ܛܝܼܡܵܢܵܐ؛ ܘܕܢܚܵܫܵܐ؛ ܘܕܦܪܸܙܠܵܐ؛ ܘܕܟܹܐܦܵܐ ܕܡܲܪܡܵܪ؛ 13ܘܕܲܪܟ̰ܝܢ؛ ܘܒܸܣܡܵܢܹ̈ܐ؛ ܘܡܘܼܪܵܐ؛ ܘܠܝܼܒܵܐܢܘܿܢ؛ ܘܚܲܡܪܵܐ؛ ܘܡܸܫܚܵܐ؛ ܘܩܲܡܚܵܐ ܕܲܝܩܵܐ؛ ܘܚܸܛܹ̈ܐ؛ ܘܩܸܢܵܝܵܐ؛ ܘܥܸܪ̈ܒܹܐ؛ ܘܣܘܼܣܵܘܵܬܹ̈ܐ؛ ܘܐܵܪ̈ܒܵܢܹܐ؛ ܘܦܲܓܼܪܹ̈ܐ؛ ܘܓܵܢܵܬܹ̈ܐ ܕܒܲܢܲܝ̈ܢܵܫܵܐ. 14ܘܛܥܘܼܢܬܵܐ ܕܫܲܗ݇ܘܲܬܬܵܐ ܕܓܵܢܵܟܼܝ ܐܙܸܠܵܐ ܡܸܢܵܟܼ؛ ܘܟܠܵܝܗܝ ܐܲܢܹܐ ܛܪ̈ܝܼܨܹܐ ܘܫܵܦܝܼܪܹ̈ܐ ܬܠܸܩܠܘܿܢ ܡܸܢܵܟܼܝ؛ ܘܐَܚܪ݇ܢܵܐ ܠܹܐ ܡܵܫَܟ̰ܚܝܼ ܠܗ݇ܘܿܢ. 15ܬܵܓ̰ܝܼܪܹ̈ܐ ܕܐܲܢܹܐ؛ ܕܒܝܼܵܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ؛ ܡ̣ܢ ܪܸܚܩܵܐ ܒܸܬ ܟܵܠܝܼ ܡܣܵܒܵܒ ܕܙܕܘܼܥܬܵܐ ܕܓ̰ܘܼܢܓ̰ܵܪܘܼܗ̇؛ ܟܲܕ ܒܸܒܟܼܵܝܵܐ ܘܒܸܥܒܼܵܕܵܐ ܬܵܙܝܼ؛ 16ܒܹܐܡܵܪܵܐ؛ ܘܵܝ؛ ܘܵܝ؛ ܡܕܝܼܢ݇ܬܵܐ ܓܘܼܪܬܵܐ؛ ܗ̇ܝ ܕܝܼܗ݇ܘܵܐ ܠܒܼܝܼܫܬܵܐ ܟܸܬܵܢ ܢܵܙܸܟ ܘܣܡܘܼܩܵܐ ܘܩܸܪܡܝܼܙ؛ ܘܡܘܼܫܩܸܠܬܵܐ ܒܕܲܗܒܼܵܐ؛ ܘܒܟܹܐܦܹ̈ܐ ܛܝܼܡܵܢܹ̈ܐ ܘܡܲܪ̈ܓܵܢܝܵܬܹܐ! ܣܵܒܵܒ ܕܒܚܕܵܐ ܣܵܥܲܬ ܚܪܸܒܼܠܵܐ ܚܕܵܐ ܗܲܕܟܼܵܐ ܕܵܘܸܠܬܵܐ. 17ܘܟܠ ܣܘܼܠܛܵܢ ܕܓܵܡܝܼ؛ ܘܟܠ ܐܵܙܵܠܢܵܐ ܠܕܘܼܢܝܹܐ ܒܓܵܡܝܼ؛ ܘܓܵܡܝܼܵܟ̰ܝܼܹܐ؛ ܘܟܠ ܕܒܝܵܡܵܐ ܦܵܠܚܝܼ؛ ܡ̣ܢ ܪܸܚܩܵܐ ܟܠܹܠܘܿܢ؛ 18ܘܡܘܼܩܘܸܚܠܘܿܢ ܟܲܕ ܒܸܚܙܵܝܵܐ ܠܬܸܢܵܐ ܕܝܩܝܼܕܘܼܗ̇؛ ܟܲܕ ܒܹܐܡܵܪܵܐ؛ ܐܲܝܢܝܼ ܝَܠܵܗ̇ ܕܟܹܐ ܕܵܡܝܵܐ ܠܗ̇ܝ ܡܕܝܼܢ݇ܬܵܐ ܓܘܼܪܬܵܐ؛ 19ܘܕܪܹܠܘܿܢ ܥܲܦܪܵܐ ܥܲܠ ܪܹ̈ܫܵܝ؛ ܘܡܘܿܩܘܸܚܠܘܿܢ ܟܲܕ ܒܸܒܟܼܵܝܵܐ ܘܒܸܥܒܼܵܕܵܐ ܬܵܙܝܼ؛ ܒܹܐܡܵܪܵܐ؛ ܘܵܝ؛ ܘܵܝ؛ ܡܕܝܼܢ݇ܬܵܐ ܓܘܼܪܬܵܐ؛ ܗ̇ܝ ܕܒܝܼܵܗ̇ ܗ݇ܘܹܠܘܿܢ ܕܵܘܠܲܬܡܲܢܕܹ̈ܐ ܟܠܵܝܗܝ ܐܵܢܝܼ ܕܐܝܼܬ ܠܗ݇ܘܿܢ ܓܵܡ̈ܝܼܹܐ ܒܝܵܡܵܐ ܡ̣ܢ ܛܝܼܡܘܼܬܘܼܗ̇! ܣܵܒܵܒ ܕܒܚܕܵܐ ܣܵܥܲܬ ܗَܘܹܐܠܵܗ̇ ܚܪܵܒܵܐ. 20ܥܒܼܘܿܕܘܿܢ ܒܘܼܣܵܡܵܐ ܥܲܠܘܼܗ̇؛ ܫܡܲܝܵܐ؛ ܘܩܲܕܝܼܫܹ̈ܐ؛ ܘܫܠܝܼܚܹ̈ܐ؛ ܘܢܒܼ̈ܝܼܹܐ؛ ܣܵܒܵܒ ܕܕܸܢܹܐ ܐܲܠܵܗܵܐ ܕܝܼܘܵܢ ܕܝܼܵܘܟܼܘܿܢ ܡܸܢܵܗ̇. 21ܘܫܩܸܠܹܗ ܚܲܕَ ܡܲܠܲܐܟܼܵܐ ܚܲܝܠܵܢܵܐ ܟܹܐܦܵܐ ܓܘܼܪܵܐ ܐܲܝܟܼ ܕܗ̇ܘ ܕܐܸܪܚܹܐ؛ ܘܕܪܹܠܹܐ ܓܵܘ ܝܵܡܵܐ؛ ܒܹܐܡܵܪܵܐ ܗܲܕܟܼܵܐ ܒܙܲܪܒ ܒܸܬ ܦܵܝܫܵܐ ܪܘܼܦܝܼܬܵܐ ܒܵܒܹܠ؛ ܡܕܝܼܢ݇ܬܵܐ ܗ̇ܝ ܓܘܼܪܬܵܐ؛ ܘܠܹܐ ܦܵܝܫܵܐ ܡܫَܟ̰ܝܼܚܬܵܐ ܡܸܢَܕܪܸܫَ. 22ܘܩܵܠܵܐ ܕܡܵܚܝܵܢܹ̈ܐ ܕܩܝܼܬܵܪܹ̈ܐ؛ ܘܕܡܘܼܣܝܼܩܘܿܪܹ̈ܐ؛ ܘܕܙܵܡܵܪܹ̈ܐ؛ ܘܕܫܝܼܦܘܿܪ̈ܟ̰ܝܼܹܐ؛ ܠܹܐ ܦܵܝܸܫ ܫܸܡܥܝܵܐ ܓܵܘܵܟܼܝ ܡܸܢَܕܪܸܫَ؛ ܘܟܠ ܐܘܼܡܵܢܵܐ ܕܟܠ ܐܘܼܡܵܢܘܼܬܵܐ ܠܹܐ ܦܵܝܸܫ ܡܫَܟ̰ܝܼܚܵܐ ܓܵܘܵܟܼܝ ܡܸܢَܕܪܸܫَ؛ ܘܩܵܠܵܐ ܕܐܸܪܚܹܐ ܠܹܐ ܦܵܝܸܫ ܫܸܡܥܝܵܐ ܓܵܘܵܟܼܝ ܡܸܢَܕܪܸܫَ. 23ܘܒܲܗܪܵܐ ܕܫܪܵܝܵܐ ܠܹܐ ܦܵܝܸܫ ܚܸܙܝܵܐ ܓܵܘܵܟܼܝ ܡܸܢَܕܪܸܫَ؛ ܘܩܵܠܵܐ ܕܚܸܬܢܵܐ ܘܕܟܵܠܬܵܐ ܠܹܐ ܦܵܝܸܫ ܫܸܡܥܝܵܐ ܓܵܘܵܟܼܝ ܡܸܢَܕܪܸܫَ؛ ܣܵܒܵܒ ܕܬܵܓ̰ܝܼܪܹ̈ܐ ܕܝܼܵܟܼܝ ܓܘܼܪ̈ܵܢܹܐ ܕܐܲܪܥܵܐ ܗ݇ܘܵܘ؛ ܣܵܒܵܒ ܕܒܚܲܪܵܫܘܼܬܵܟܼܝ ܦܸܫܠܗَܘܿܢ ܡܘܼܚܠܸܛܹܐ ܟܠܵܝܗܝ ܛܵܝܸܦܹ̈ܐ. 24ܘܒܝܼܵܗ̇ ܕܸܡܵܐ ܕܢܒܼ̈ܝܼܹܐ ܘܕܩܲܕܝܼܫܹ̈ܐ ܡܫَܟ̰ܸܚܠܹܐ؛ ܘܕܟܠܵܝܗܝ ܐܵܢܝܼ ܕܦܝܼܫܹܐ ܝܢܵܐ ܦܪܝܼܡܹܐ ܥܲܠ ܐܲܪܥܵܐ.